श्रीमतीको हत्या आरोपमा श्रीमान पक्राउ

सन्धिखर्क – अर्घाखाँचीमा आफ्नै श्रीमानले लोहोरो प्रहार गरी श्रीमतीको हत्या गरेका छन् ।

अर्घाखाँचीको शितगंगा नगरपालिका-३, ठाडाका ५४ वर्षीय पिताम्बर भुसाल लोहोरोले हानेर श्रीमतीको हत्या गरेका छन्। घरायसी विवादका कारण मसाला पिस्न प्रयोग हुने लोहोरो हानेर ५० वर्षीया मनकलाको हत्या गरेका हुन्।

जिल्ला प्रहरी कार्यालय अर्घाखाँचीका प्रहरी नायव उपरिक्षक मुकुन्द रिजालका अनुसार प्रारम्भिक अनुसन्धानबाट घरमा पटक पटक झगडा हुने गरेको पाइएको छ।

पोष्टमार्टमका लागि जिल्ला अस्पताल अर्घाखाँचीमा पठाएको उनले बताए। मनकलाको घटनास्थलमै मृत्यु भएको थियो। मृतकका श्रीमानलाई इलाका प्रहरी कार्यालय ठाडाले नियन्त्रणमा लिइसकेको छ।

घटनाका विषयमा थप अनुसन्धान भइरहेको इलाका प्रहरी कार्यालय ठाडाका प्रहरी निरीक्षक होम रेग्मीले जानकारी दिए।