आगामी वर्षबाट कृषिमा लगानी दशक सुरु गरिने

काठमाडौं – सरकारले आउँदो आर्थिक वर्ष कृषि दशक घोषणा गर्ने भएको छ । संघीय संसद्को मंगलबार बसेको संयुक्त बैठकमा सरकारको नीति तथा कार्यक्रम प्रस्तुत गर्दै राष्ट्रपति रामचन्द्र पौडेलले आउदो आर्थिक बर्षलाई कृषि लगानी दशक घोषणा गरिने बताएका हुन् ।

उनले भने, ‘कृषि पशुपन्छिपालन र वनको अन्तरसम्बन्धन स्पष्ट हुने गरी भूउपयोगको आधारमा कृषि प्रणालीको विकास गरिनेछ । आर्थिक वर्ष ०८१/०८२ को दशकलाई कृषिमा लगानी दशक घोषणा गरिनेछ ।’

सरकारले देशलाई आगामी पाँच वर्षभित्रमा देशलाई आत्मनिर्भर बनाउने घोषणा गरेको छ । आगामी आर्थिक वर्षको नीति तथा कार्यक्रम संसद्मा प्रस्तुत गर्दै राष्ट्रपतिले सरकारको यो लक्ष्य सुनाएका हुन् । फलफूलको नर्सरी तथा बेर्ना रोपनलाई व्यापक विस्तार गरी पाँच वर्षभित्र देशलाई फलफूलमा आत्मनिर्भर बनाउने सरकारको योजना छ ।

दुई वर्षभित्र पशुपंक्षी तथा मत्स्य उत्पादनमा पनि आत्मनिर्भर बनाउने सरकारको घोषणा छ । स्थानीय तहहरूसँगको साझेदारीमा तरकारी, फलफूल तथा दुग्धजन्य पदार्थको बजार व्यवस्थापन गर्ने पनि सरकारले नीति कार्यक्रममा उल्लेख गरेको छ । उत्पादक र उपभोगबीच कृषि उपजको मूल्यअन्तरलाई निश्चित प्रतिशतमा सीमित गर्ने पनि सरकारको घोषणा छ ।