नेपाली क्रिकेट टीमका प्रशिक्षक दाशानायकेले दिए राजीनामा

काठमाडाैं – नेपाली राष्ट्रिय क्रिकेट टीमका प्रशिक्षक पुबुदु दाशानायकेले पदबाट राजीनामा दिएका छन् । स्कटल्यान्ड भ्रमणका क्रममा नेपाली टोलीको प्रदर्शन निकै कमजोर भएपछि दाशानायकेले राजीनामा दिएका हुन् ।

क्यान स्रोतका अनुसार उनले मंगलवार नै इमेलमार्फत राजीनामा बुझाएका थिए । दाशानायकेले बुधवार पत्रकार सम्मेलन गरी आफूले राजीनामा दिएको औपचारिक जानकारी गराए ।

पहिलोपटक झण्डै ४ वर्ष जिम्मेवारी सम्हालेर नेपाली टोलीलाई नयाँ उचाइमा पुर्‍याएका पुबुदुको दोस्रो कार्यकाल स्मरणीय हुन सकेन । क्यानले नै राजीनामाका लागि दबाब दिएपछि दाशानायकेले राजीनामा बुझाएको स्रोतको दाबी छ । स्कटल्यान्ड भ्रमणमा ४ खेल खेल्दा नेपाल एउटामा मात्र विजयी भएको थियो ।