राष्ट्र बैंकले १० रुपैयाँका ३४ करोड थान नोट छाप्ने
सेरोफेरो आज |
काठमाडौं – नेपाल राष्ट्र बैंकले १० रुपैयाँका ३४ करोड थान नयाँ नोट छाप्ने भएको छ । शुक्रबार एक सार्वजनिक सूचना जारी गर्दै राष्ट्र बैंकले नोटको डिजाइनसहित छपाई र ढुवानीसहितको जिम्मेवारीका लागि अन्तर्राष्ट्रिय बोलकबोल आह्वान गरेको हो ।
तथापी, राष्ट्र बैंकबाट गत अक्टोबर २०२१ मा नै जारी बोलकबोलमा सहभागी भई प्रारम्भिक छनोटमा परेका योग्य कम्पनी तथा फर्महरुलाई पुनः दरखास्त आह्वान गरेको हो । योग्य आवेदनकर्ताले एकल चरण दुई खाममा छुट्टाछुट्टै छापसहितको दुईवटा आवेदन हाल्नुपर्नेछ ।
राष्ट्र बैंक मुद्रण विभागका अनुसार आवेदन आउँदो अगस्ट ८, २०२४ मा खुल्नेछ । योग्य छनोटमा परेका आवेदकले सेप्टेम्बर २, २०२४ दिनको १ बजेसम्म आवेदन दिन सक्नेछन् ।
छनोटमा परेका र टेन्डर पाएको कम्पनीले स्वीकृतिको अधिकतम १२० दिनभित्र नोट छपाई गरी ढुवानी समेत गरिसक्नुपर्ने केन्द्रीय बैंकले जनाएको छ । आवेदक कम्पनीले धितोको रूपमा अधिकतम २ करोड २० लाख रुपैयाँ राख्नुपर्नेछ ।
