रुस र युक्रेनबीचकाे दुई पक्षीय वार्ता सकारात्मक

अंकरा – रुस र युक्रेनबीच एक महिना देखि चलेको युद्ध रोकिने सम्भावना बढेको छ । आज टर्कीमा भएको दुई पक्षबीचको वार्ता सकारात्मक मोडतर्फ बढेको जनाइएको छ । वार्तापछि रुसी पक्षले सकारात्मक संकेतहरु मिलेको प्रतिक्रिया दिएको छ ।

लगत्तै रुसले युक्रेनी राजधानी किभमा सैन्य फौजको सक्रियता घटाउने निर्णय गरेको छ । यसअघि नै रुसले किभभन्दा अन्यत्र सक्रियता बढाउने निर्णय लिएको थियो । रुसका सहायक रक्षामन्त्री अलेक्जेन्डर फोमिनले मङ्गलबार किभ र चेरनिगोभमा सैन्य गतिविधि घटाउने घोषणा गरे । उनले निर्णायक संवाद किभमा हुने बताए ।

फोमिनले युक्रेन तटस्थ राष्ट्र बन्ने देखि परमाणु हतियाररहित रहने शर्तमा तयार भएपछि वार्ता सकारात्मक मोडतर्फ बढेको जनाए । यसअघि युक्रेनका राष्ट्रपति जेलेन्सीकले तटस्थ देश बन्ने तर त्यो युक्रेनी जनताले जनमतसंग्रहबाट निर्णय लिने बताएका थिए ।

रुसले भने क्रिमियाका अलावा पूर्वी युक्रेनका केही भूभागमा त्यहाँको जनताको निर्णय मान्नुपर्ने शर्त राख्दै आएको छ । उसले ती भू-भाग नियन्त्रणमा लिन खोजेको चर्चा चलिरहेको छ । क्रिमियामा रुसले नियन्त्रण बनाइराखेको छ । तर, अन्तर्राष्ट्रिय समुदायले मान्यता दिएको छैन ।

यसैगरी, रुस र युक्रेनबीचको युद्ध रोकिने सम्भावना बढेपछि कच्चा तेलको मूल्य ह्वात्तै घटेको छ । आज साँझ मूल्य घटेर सय डलर भन्दा केही बढी कायम भएको छ । एजेन्सी