त्रिदेशीय सिरिजमा आज दुई पाहुना टिम नेदरल्यान्ड र मलेसिया खेल्दै
सेरोफेरो आज |
काठमाडौं – कीर्तिपुरस्थित त्रिभुवन विश्वविद्यालयको मैदानमा जारी त्रिदेशीय टी–२० क्रिकेट सिरिजअन्तर्गत आजको खेलमा दुई पाहुना टिम मलेसिया र नेदरल्यान्ड भिड्दैछन्।
पहिलो खेलमा आयोजक नेपालसँग पराजय भोगेको नेदरल्यान्ड दोस्रो खेलमा पुनरागमन गर्दै जित निकाल्न चाहन्छ। यता मलेसिया टी–२० क्रिकेटमा पछिल्लो समय निकालेको जितलाई निरन्तरता दिने क्रममा छ।
महामारीअघि घरेलु भूमिमा मलेसियाले आफूभन्दा बलियो टिम हङकङविरुद्ध लगातार जित निकालेको थियो। त्यस्तै, उसले १३ महिनाअघि सम्पन्न इस्टर्न रिजर्नमा पनि नेपालको भन्दा राम्रो प्रदर्शन गरेको थियो।
आईसीसी वरियताका निकै तल रहे पनि मलेसियाले बलिया टिमहरुलाई हराउँदै आइरहेकाले उसले आजको खेलमा पनि त्यो लय प्रस्तुत गर्ने देख्न सकिन्छ।
उसले महामारीअघि भएको खेलमा नेपाल, थाइल्यान्ड र हङकङ जस्तो टिमलाई हराएको थियो। आजको खेलमा जित निकाल्न सके नेदरल्यान्डले फाइनल पुग्ने सम्भावना कामय राख्नेछ। तर पराजय भोगे उसको फाइनल यात्रामा धक्का लाग्न सक्नेछ।
नेदरल्यान्डले २०२० मा कुनै खेल नखेले पनि २०१९ मा खेलेको अन्तिम पाँच खेलमा जित निकालेको थियो। त्यसपछि हिजोको खेलमा नेपालसँग हार बेहोरेको हो।
मलेसियाले चाहिँ पछिल्ला पाँच खेलमध्ये तीन खेलमा जित निकालेको छ। आजको खेल त्रिवि मैदानमा सवा १२ बजे सुरु हुनेछ।
