सुन बिक्री नभएपछि रोकियो आयात

काठमाडाै‌ – बजारमा सुनको माग नभएपछि विदेशबाट हुने आयात रोकिएको छ । नेपाल सुनचाँदी व्यवसायी महासंघले विदेशबाट हुने सुनको आयात रोकिएको जानकारी दिएको हो ।

महासंघका अध्यक्ष मणिकरत्न शाक्यले अफ सिजन भएकाले माग नभएको र आयात समेत रोक्न अनुरोध गरेको बताए । महासंघले सुन आयात गर्ने जिम्मेवारी पाएको नेपाल बैंकर्स संघलाई सुन आयातको सिफारिस रोक्न अनुरोध गरेअनुसार आयात रोकिएको हो ।

अध्यक्ष शाक्यले भने, ‘यतिबेला नेपाली बजारमा सुनको मूल्य वर्षकै उच्च बिन्दुमा छ । यहि कारण, सुनको माग छैन । यस्तै, पुस महिना सुनको अफसिजन समेत हो ।’ यहि कारण, यतिबेला सुनको आयात रोकिएको उनले बताए ।

वाणिज्य बैंकहरूले केन्द्रीय बैंकको स्वीकृतीमा सुन आयात गर्दै आइरहेका छन् । व्यवसायीहरूले वाणिज्य बैंकसँग बजारको माग अनुसार सुन उठाउने गरेका छन् ।