देशभरका शैक्षिक संस्था आजदेखि तीन दिन बिदा

काठमाडौं – देशभर वर्षासँगै आएको बाढीपहिरोपछि सरकारले शैक्षिक संस्था आइतबारदेखि तीन दिन बिदा दिएको छ । सरकारले देशभर तीन दिनसम्म विद्यालय बन्द गर्ने निर्णय गरेको हो ।

बाढी र पहिरोले देशभरका शैक्षिक संस्थामा क्षति पुगेको, विद्यार्थी र अभिभावक बाढीपहिरोको चपेटामा परेको, यातायात अवरुद्ध भएको र दैनिक जीवनयापनमा कठिनाइ भएको जनाउँदै शिक्षा मन्त्रालयले शनिबार नै विद्यालय बन्दको निर्णय गरेको थियो । यता विश्वविद्यालय तथा चिकित्सा शिक्षा आयोगले सञ्चालन गर्ने आजको परीक्षा पनि अर्को सूचना नआउञ्जेलसम्मका लागि स्थगित भएको छ ।

मन्त्रालयले आइतबारदेखि नै लागु हुने गरी सम्पूर्ण विश्वविद्यालयको परीक्षा एक साताकै लागि स्थगित गर्ने विषयमा सम्बन्धित विश्वविद्यालयसँग परामर्श गरेको थियो तर एक सातासम्म परीक्षा पर लैजाँदा शैक्षिक पात्रो नियमित गर्न अप्ठ्यारो पर्ने राय विश्वविद्यालयका पदाधिकारीबाट अनुकुलताका आधारमा परीक्षा सञ्चालनको तयारी भएको छ।

हाल विश्वविद्यालयमा स्नातक तथा स्नताकोत्तर तहका परीक्षा सञ्चालन भइरहेका छन्। यस्तै अधिकांश विद्यालयमा कक्षा १२ सम्मकै विद्यार्थीको प्रथम त्रैमासिक परीक्षा सञ्चालन हुँदैछ । शुक्रबार साँझदेखिको झरी र बाढीका कारण उपत्यकासहितका बाहिरका जिल्लाका शैक्षिक संस्था डुबेका छन् ।