दशैंको शुभकामना दिदैँ प्रचण्ड भन्छन् – निर्वाचनमा प्रतिगमन विरोधी शक्तिलाई मत दिनू

काठमाडाैं ( नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले दशैं, तिहार, छठ, नेपाल संवत्, ल्होसार लगायतका पर्वको शुभकामना दिँदै आसन्न चुनावमा प्रतिगमन विरोधी शक्तिलाई मत दिन अपिल गरेका छन् । आइतवार बिहान जारी शुभकामना सन्देशमा प्रचण्डले देशको भाषा, संस्कृति र सभ्यताहरूको संरक्षण गर्दै तिनको समृद्धिमा लाग्नु हामी सबैको दायित्व रहेको जनाएका हुन् ।

प्रचण्डले ‘हाम्रा सबै प्रमुख चाडहरूका आ–आफ्नै पृष्ठभूमि, मौलिकता र मूल्यहरू छन् । देशको भाषा, संस्कृति र सभ्यताहरुको संरक्षण गर्दै तिनको समृद्धिमा लाग्नु हामी सबैको दायित्व हो,’ सन्देशमा उल्लेख छ, ‘सांस्कृतिक पर्वहरूको शृंखलाभित्र अब हामी प्रादेशिक र संघीय निर्वाचनको संघारमा पनि छौं । आगामी मंसिर ४ गते हुन गइरहेको यस निर्वाचनमा प्रतिगमन विरोधी शक्तिलाई मत दिई संविधान, गणतन्त्र, संघीयताको रक्षा र सुदृढीकरणका लागि विजय गराउनुहुन आम जनसमुदायमा हार्दिक अपिल गर्दछु ।’

असत्य माथिको सत्यको विजयका रूपमा मनाइने नेपाली सांस्कृतिक पर्वहरूले सबैमा उत्साह, उमंग र राष्ट्रियताको जगेर्ना गर्ने उत्प्रेरणा पैदा गरोस् भनी प्रचण्डले शुभकामना व्यक्त गरेका छन् ।