उपप्रधान एवम् यातायातमन्त्री श्रेष्ठ र अमेरिकी राजदूतबीच भेटवार्ता

काठमाडौं – उपप्रधानमन्त्री एवम् भौतिक पूर्वाधार तथा यातायातमन्त्री नारायणकाजी श्रेष्ठसँग नेपालका लागि अमेरिकी राजदूत डिन आर थम्पसनले शिष्टाचार भेट गरेका छन्। मन्त्रालयमा पुगेर राजदूत थम्पसनले उपप्रधानमन्त्री श्रेष्ठलाई बधाई दिएको उनका प्रेस संयोजक कमल गिरीले जानकारी दिए।

परराष्ट्र मन्त्रालयका प्रतिनिधिसहितको उपस्थितिमा भएको उक्त भेटमा थम्पसनले नेपाल–अमेरिका औपचारिक सम्बन्धले ७५ वर्ष पुरा गरेको स्मरण गर्दै नेपालको विकासका लागि अमेरिकाले आफ्नोतर्फबाट सहयोगलाई निरन्तरता दिने प्रतिबद्धता जनाएका छन्।

नेकपा (माओवादी केन्द्र)का वरिष्ठ नेता नारायणकाजी श्रेष्ठले भौतिक पूर्वाधार तथा यातायात मन्त्रालय सम्हालेकोमा राजदूत थम्पसनले खुशी व्यक्त गरे। थम्पसनले ऊर्जा र मानवीय क्षेत्रमा मात्र नभएर नेपालको आर्थिक–सामाजिक र कृषिको विकासमा समेत सहयोग गर्न अमेरिका इच्छुक रहेको बताए ।

उपप्रधानमन्त्री श्रेष्ठले थम्पसनलाई राजदूतका रूपमा नेपालको बसाइँ उपलब्धिमुलक रहोस् भन्दै शुभेच्छा प्रकट गरे । तीन महिनादेखि नेपाललाई नजिकबाट अनुभूति गरिरहँदा आफूलाई यहाँको जनजीवन र प्रकृतिले सम्मोहित बनाएको थम्पसनले बताए।