सांसद शर्माको चेतावनी- माग पुरा नभए आमरण अनसन बस्छु

काठमाडौं – सत्ता साझेदार नेपाली कांग्रेसका सांसद सुनिल शर्माले प्रधानमन्त्री पुष्पकमल दाहाल ‘प्रचण्ड’ ले माफी नमागे र उपप्रधानमन्त्री तथा गृहमन्त्री नारायणकाजी श्रेष्ठले राजीनामा माग गरेका छन् । उनले आफ्नो माग पुरा नभए आमरण अनसन बस्ने चेतावनी दिएका छन् ।

‘अहिलेका गृहमन्त्रीले विना शर्त राजीनामा गर्नुपर्छ, मेरो अहिलेदेखि अन्तिमसम्म माग छ । यदि गृहमन्त्रीले राजीनामा गर्नु हुन्न र प्रधानमन्त्रीले ‘अपोलोजी’ गर्नु हुन्न भने आमरण अनसन डिक्लियर गर्छु’ उनले सोमबारको प्रतिनिधिसभा बैठकमा भने ।

शर्माले नक्कली सर्टिफिकेट प्रकरणमा आफूलाई प्रहरीले पक्राउ गरी लगेको विषयमा प्रतिनिधिसभा बैठकमा आपत्ति जनाएका छन् । शर्माले भने, ‘देशको प्रधानमन्त्री र गृहमन्त्रीले आतंककारीहरूको नेतृत्व गरिराख्नु भएको छ कि डेमोक्रेटिकको नेतृत्व गरिराख्नु भएको छ ?’

शर्माले आतंककारीको नेतृत्व गरेको भनेर प्रधानमन्त्री र गृहमन्त्रीमाथि आरोप लगाएसँगै नेकपा माओवादी केन्द्रका प्रमुख सचेतक हितराज पाण्डे नियमापत्ति भन्दै उठेर विरोध गरेका थिए । सभामुख देवराज घिमिरेले तत्कालै पाण्डेलाई बोल्न नदिएपछि माओवादीका अन्य सांसदहरूले पनि उठेर विरोध जनाएका थिए ।

उनलाई नक्कली कागजात तथा विवरण पेस गरेको अभियोगमा प्रहरीले नियन्त्रणमा लिएको थियो । साउन २६ गते प्रहरीले थप अनुसन्धानका लागि हिरासतमा राख्न म्याद थप गर्न शर्मालाई अदालत उपस्थित गराएको थियो । तर अदालतले म्याद थप गर्न अस्वीकार गरेपछि शर्मा हिरासत मुक्त भएका थिए । उनी मोरङ ३ बाट निर्वाचित नेपाली कांग्रेसका सांसद हुन् ।