धारिलो हतियार प्रयोग गरी नुवाकोटमा आमाछोरीको हत्या, एक जना पक्राउ
सेरोफेरो आज |
नुवाकोट – नुवाकोटमा धारिलो हतियार प्रयोग गरी आमाछोरीको हत्या भएकाे छ । दुप्चेश्वर गाउँपालिका-५ बालकुमारीको भङ्गेरीकी २० वर्षीया सम्झना पाण्डे खतिवडा र उनकी तीन वर्षीया छोरी कृष्टिना खतिवडाको हिजाे बेलुका हत्या भएको हाे ।
घटनामा संलग्न रहेको आराेपमा प्रहरीले आज बिहान एक जनालाई पक्राउ गरेको छ । पक्राउ पर्नेमा त्यही ठाउँका २१ वर्षका पुष्कल भनिने सोनम तामाङ रहेका जिल्ला प्रहरी कार्यालय नुवाकोटका प्रहरी नायब उपरीक्षक रुपक खड्काले जानकारी दिए ।
उनका अनुसार ती व्यक्ति घरेलु हतियारसहित सम्झनाकाे घरतर्फ गएको, घटनास्थलमा उनले बोकेको घरेलु हतियार र उनको चप्पल भेटिएको छ । घटनालगत्तै उनी फरार रहेको पाएपछि काठमाडाैं तर्फ जान लागेको समयमा आज बिहान पक्राउ गरिएकाे हाे ।
धारिलो हतियार प्रयोग गरेर घाँटीसहित शरीरको विभिन्न अङ्गमा गहिरो चोट पुर्याएर उनीहरूको हत्या गरेको अवस्थामा घरको आँगनमा आमा र पिँढीमा छोरीको शव भेटिएको थियो ।
