बाइककाे ठक्करबाट सवारी चेकिङमा खटिएका ट्राफिक हवल्दारको मृत्यु, जवान घाइते

नेपालगञ्ज – मोटरसाइकलले ठक्कर दिँदा बाँकेमा सवारी चेकिङमा खटिएका ट्राफिक प्रहरी हवल्दारको मृत्यु भएको छ । मोटरसाइकलको ठक्करबाट अर्का एक प्रहरी कर्मचारी घाइते भएका छन्।

नेपालगञ्ज उपमहानगरपालिका-२० राझाँ चोकमा ड्युटीमा खटिएका अस्थायी प्रहरी बिट राझाँ बाँकेमा कार्यरत ३६ वर्षीय प्रहरी हवल्दार भुपेन्द्र शाहीको भे१० प ४७५७ नम्बरको मोटरसाइकलको ठक्करबाट सोमबार राति मृत्यु भएको हो ।

ठक्करबाट गम्भीर घाइते भएका हवल्दार शाहीको नर्सिङहोम नेपालगञ्जमा उपचारको क्रममा मृत्यु भएको हो। साथै सोही मोटरसाइकलको ठक्करबाट घाइते भएका १ जना प्रहरी कर्मचारी (जवान)को नर्सिङहोम नेपालगञ्जमा उपचार भइरहेको छ।

मोटरसाइकल चालकलाई प्रहरीले नियन्त्रणमा लिएको छ। उक्त चोकमा ट्राफिक सहितको संयुक्त चेकिङ भइरहेको अवस्थामा नेपालगंजबाट कोहलपुरतर्फ जाँदै गरेको सो मोटरसाइकलले दुवै जनालाई ठक्कर दिएको थियो।